दुई खेलाडी चम्कँदा मच्छिन्द्र क्लबले जारी एन्फा यु–१६ युथ लिगमा मंगलबार सानदार जितसँगै दोस्रो सफलता आत्मसात् गरेको छ।
सातदोबाटोस्थित एन्फा कम्प्लेक्समा मच्छिन्द्रले आफ्नो दोस्रो खेलमा प्लानिङ ब्वाइज युनाइटेडमाथि ७–० को रबाफिलो जित निकाल्यो। दिनको पहिलो खेलमा जावलाखेल युथ क्लबले त्रिभुवन आर्मी क्लबमाथि ३–२ को कठिन जित निकाल्यो। जावलाखेलको जितमा विशाल शाहीले दुई तथा प्रिन्स भुजेलले एक गोल गरे। आर्मीका नीरज अधिकारी र सोहित वाइबाले समान एक गोल गरे।
यता, मच्छिन्द्रलाई लगातार दोस्रो जित दिलाउन करण धामी र सुमन बम ठकुरीले समान दुई गोल गरे। विकास थापा, राहुलकुमार योन्जन र आर्यवीर सिंहले समान एक गोल थपे। यससँगै मच्छिन्द्रले लगातार दोस्रो खेलमा जित निकाल्दा प्लानिङले भने पहिलो हार सामना गर्यो।
पहिलो खेलमा मच्छिन्द्रले एपिएफ र प्लानिङ ब्वाइजले सातदोबाटो युथ क्लबलाई हराएका थिए। समान दुई खेलबाट मच्छिन्द्रले ६ अंक र प्लानिङ ब्वाइजले तीन अंक जोडेका छन्। मच्छिन्द्रले पहिलो हाफमा नै ६ गोल गर्दै खेल पूर्ण नियन्त्रणमा राखेको हो। तर, दोस्रो हाफमा भने प्लानिङ समालियो र एक गोल मात्र सामना गर्यो। त्यसअघि खेलको छैटौं मिनेटमा करणको गोलबाट मच्छिन्द्रले अग्रता लिएको थियो। ६ मिनेटपछि करणले नै टोलीको अग्रता दोब्बर बनाए। सुमनले १९औं मिनेटमा टोलीका लागि तेस्रो गोल गरे। दुई मिनेटपछि नै विकासले गोल गर्दा मच्छिन्द्रको अग्रता ४–० मा पुग्यो। सुमनले २४औं मिनेटमा व्यक्तिगत दोस्रो गोल गरे।
३३औं मिनेटमा राहुलले टोलीको छैटौं गोल गरे। यससँगै मच्छिन्द्रले पहिलो हाफमै ६–० को अग्रता लियो। दोस्रो हाफमा भने प्लानिङले आफ्नो रक्षापंक्तिमा सुधार गर्यो। मच्छिन्द्रले अर्को गोल गर्न धेरै समय लगायो। उसले सातौं गोलका लागि भने खेलको अन्त्यसम्म कुर्नुपर्यो।
इन्जुरी समयमा आर्यवीरले गोल गरेपछि मच्छिन्द्रले प्लानिङमाथि ७–० को जित निकाल्यो। दिनको पहिलो खेलमा आर्मी र जावलाखेलले पहिलो हाफमा बराबरी गर्ने अनुमान गरिएको थियो। तर, थप समयमा विशाल शाहीले गोल गर्दै अग्रता दिलाए। तर, दोस्रो हाफमा भने दुवै तर्फबाट समान दुई गोल भयो। ६७औं प्रिन्स भुजेलले गोल गर्दै जावलाखेलको अग्रता बढाए।
तर, आर्मीले दुई गोल फर्काउँदै खेलमा फर्किने संकेत गर्यो। तीन मिनेटको अन्तरमा आर्मीले दुई गोल गरेको हो। ७०औं मिनेटमा नीरज अधिकारी र ७३औं मिनेटमा सोहित वाइबाले गोल गर्दै आर्मीलाई २–२ को बराबरीमा ल्याए। तर, ८१औं मिनेटमा विशालले व्यक्तिगत दोस्रो गोल गर्दै आर्मीको लक्ष्य पूरा हुन दिएनन्। त्यसपछि दुवैतर्फबाट थप गोल हुन सकेन र जावलाखेलमाथि ३–२ को जित निकालेको थियो। समान दुई खेलमा आर्मी र जावलाखेको समान एक जित र हार छ। पहिलो खेलमा आर्मी हिमालयन शेर्पालाई ३–१ ले हराउँदा जावलाखेलले भने संकटासँग ७–० को हार बेहोरेको थियो।
