अनुज सापकोटा
विराटनगर –३ स्थित डिभिजन कार्यालय परिसरमा रहेको वायु प्रदुषण सम्बन्धी तथ्याङ्क प्रवाह गर्ने डिस्प्ले बोर्ड संचालनका लागि पहल थालिएको छ ।
विगत १ वर्षदेखि सो डिस्प्ले बोर्ड संचालनमा आएको छैन । बोर्डमा तथ्याङ्क देखाउन आवश्यक यन्त्रभने महेन्द्र मोरङ आदर्श बहुमुखी क्याम्पसमा जडान गरिएको थियो । क्याम्पसबाट यन्त्रका विभिन्न पार्टपुर्जा हराएपछि बोर्डमा तथ्याङ्क देखिन छाडेको थियो । बोर्डमा प्रवाह हुने तथ्याङ्कले कोशी प्रदेशमात्र नभई सम्पूर्ण देशभरीकै वायु प्रदुषणको अवस्था कस्तो छ भन्ने जानकारी प्राप्त हुने गरेको थियो ।
डिस्प्ले बोर्डमा जानकारी प्रवाह हुन छाडेपछि डिभिजन वन कार्यालयले पनि काठमाडौ स्थित पर्यटन, वन तथा वातावरण विभागमा मर्मतका लागि जानकारी गराएको थियो । विभागले नै देशका ७ प्रदेशका राजधानीमा प्रदुषणसम्बन्धी यन्त्र र बोर्ड जडान गर्ने योजना अनुसार नै विराटनगरमा पनि यन्त्र र बोर्ड जडान गरेको थियो । सूचना आउन छाडेपछि कोशी प्रदेशका पर्यटन, वन तथा वातावरण मन्त्रालयका सचिव विशाल घिमिरेले विभागलाई समस्या अवगत गराएका थिए । विभागले समस्यालाई गम्भीरतापूर्वक लिएको थियो ।
डिभिजन वन कार्यालयका वन अधिकृत एवं सूचना अधिकारी रामलखन ठाकुरले बोर्डले वायु प्रदुषणसम्बन्धी जानकारी प्रवाह गर्ने गरेको भएपनि विगत केहि समयदेखि बोर्ड संचालनमा नरहेको बताए । उनले महेन्द्र मोरङमा जडान गरिएको यन्त्रका पार्टपुर्जा चोरी भएको हुनाले बोर्डमा वायु प्रदुषण सम्बन्धी गतिविधि प्रकासित नभएको बताए ।
पर्यटन, वन तथा वातावरण मन्त्रालय कोशी प्रदेशका वातावरण निरीक्षक हरि शंकर झाले विभागले यन्त्र र बोर्ड संचालनका लागि प्रयास थालेको बताए । आगामी आर्थिक वर्षमा बोर्डमा वायु प्रदुषण सम्बन्धी सूचना बीनाकुनै अवरोध प्रवाह हुन सक्ने बताए ।
डिभिजन वन कार्यालयले वन विनाश रोक्नका लागि जागरूकता र सचेतनालाई तिव्र बनाएको छ । कार्यालयको कम्पाउण्ड वालको भित्तामा वन विनाश रोक्दै वातावरणलाई स्वच्छ र हराभरा बनाउने सन्देश अंकित गरिएको छ । सन्देशमा रूखबाट हुने असंख्य फाइदाबारेपनि बयान गरिएको छ ।
