काठमाडौं । कर्णाली प्रदेशको दुर्गम जिल्ला हुम्ला अब औपचारिक रूपमा राष्ट्रिय सडक सञ्जालमा जोडिएको छ । कर्णाली करिडोर अन्तर्गत खार्पुनाथ गाउँपालिका–५ स्थित च्वाखोला नदीमा बेलिब्रिज निर्माणसँगै हुम्ला सडक पहुँचमा समावेश भएको हो ।
प्रधानमन्त्री केपी शर्मा ओलीले आइतबार आयोजित एक विशेष समारोहमा उक्त बेलिब्रिजको उद्घाटन गर्दै हुम्ला सडक सञ्जालमा जोडिएको घोषणा गरे । यस अवसरमा भौतिक पूर्वाधार तथा यातायात मन्त्री देवेन्द्र दाहाल पनि सहभागी थिए ।
योसँगै, अहिलेसम्म राष्ट्रिय सडक सञ्जालबाट पूर्ण रूपमा टाढा रहेको एकमात्र जिल्ला हुम्ला पनि मुलुकको सडक सञ्जालमा समावेश भएको छ । करिब २६ वर्षअघि सुरु भएको प्रयास बल्ल साकार भएको हो । यसअघि सडक सञ्जालको पहुँच सदरमुकाम सिमकोटसम्म पुगेको थिएन ।
कर्णाली करिडोरको बाँकेको जमुनियादेखि हुम्लाको हिल्सासम्म दूरी ५१० किलोमिटर रहेको छ । करिडोरले कर्णाली प्रदेशलाई उत्तरमा चीन र दक्षिणमा भारतसँग जोड्ने महत्वपूर्ण भौगोलिक तथा आर्थिक अवसर प्रदान गर्ने अपेक्षा गरिएको छ । प्रधानमन्त्री ओलीले वैदेशिक व्यापारमा समेत यसले ठूलो टेवा पुर्याउने विश्वास व्यक्त गरे ।
राष्ट्रिय गौरवको आयोजना मानिएको कर्णाली करिडोरको शिलान्यास २०५६ सालमा गरिएको थियो । सुर्खेतदेखि सिमकोट हुँदै हिल्सा नाका पुग्ने ६८२ किलोमिटर लामो यो मार्गमा हालसम्म विभिन्न खण्डमा चरणबद्ध रूपमा निर्माणकार्य हुँदै आएको छ ।
सडक विभागले २०६६ सालसम्म यो आयोजनाको जिम्मा लिए पनि त्यसपछि नेपाली सेनाले हिल्सा–मकोट खण्डको १४५ किलोमिटर ट्र्याक खोल्ने कार्य अघि बढाएको थियो । भौतिक पूर्वाधार तथा यातायात मन्त्रालयको २०७६/७७ को वार्षिक प्रगति प्रतिवेदन अनुसार, उक्त खण्डका लागि ४ वटा पुलसहितको निर्माण लागत करिब ४ अर्ब १० करोड रुपैयाँ रहेको छ ।
च्वाखोला नदीमाथिको नयाँ बेलिब्रिजले दशकौँदेखिको सपना साकार गर्दै हुम्लाबासीलाई राष्ट्रिय मुख्यसडकसँग जोडेको छ, जसले यातायात, व्यापार, स्वास्थ्य सेवा र पर्यटनमा नयाँ सम्भावना खोल्नेछ ।
