विराटनगर। कोशी प्रदेश खेलकुद विकास बोर्डको खेलकुद सम्बन्धी अन्तर प्रदेश भ्रमण तथा अनुभव आदान प्रदान कार्यक्रम सम्पन्न भएको छ। बोर्डले अन्तर प्रदेश भ्रमण तथा आदान प्रदान कार्यक्रमको क्रममा गण्डकी, बागमती र मधेश प्रदेशका समकक्षी बोर्ड र परिषद्को भ्रमण गर्दै अनुभव आदान प्रदान गरेको हो।
अनुभव आदान प्रदान कार्यक्रममा पोखरामा बोल्दै गण्डकी प्रदेश खेलकुद परिषद्का सदस्य सचिव श्रीधर शर्माले परिषद्ले नेपाल सरकारको नाममा रहेको खेलकुद संरचना प्रदेश मातहत ल्याउने तयारी गरेको बताउनु भएको थियो। शर्माले परिषद्ले खेल संस्थाहरू र प्रदेशमा सक्रिय प्रशिक्षक, रेफ्रीलाई अनिवार्य सूचिकृत गर्ने व्यवस्था गरेको जानकारी दिनु भयो।
उहाँले खेलाडी कल्याणकारी कार्यक्रम संचालन कार्यविधि, खेल गतिविधिको टिकटबाट उठेको रकमको केही प्रतिशत कर्मचारी कल्याण कोषमा राख्ने व्यवस्था र खेलाडीलाई मर्यादाक्रममा ल्याउने तयारी गरेको अनुभव समेत साझा गर्नु भएको थियो।
गण्डकी प्रदेश खेलकुद परिषद्का ध्वज कुमार गुरुङले प्रदेशले साहसिक खेलकुद र खेलकुद पर्यटनको प्रवर्द्धनलाई थप प्राथिमिकतामा राखेको धारणा व्यक्त गर्नु भएको थियो।
त्यस्तै, हेटौँडामा बागमती प्रदेश खेलकुद विकास परिषद्का सदस्य सचिव दिपक लामाले नेपालमा ‘स्पोर्ट टुरीज्म’ को रुपमा विकास गर्न केन्द्रीय सरकार र राष्ट्रिय खेलकुद परिषद्ले प्रदेश खेलकुद परिषद्लाई विश्वासमा लिएर काम गर्नु पर्ने भयो। लामाले परिषद्ले ‘प्रथम पारा खेलकुद प्रतियोगिता’ आयोजना गर्न सफल भएको समेत बताउनु भएको थियो।
जनकपुर स्थित मधेश खेलकुद परिषद्का सदस्य सचिव शिवजी गुप्ताले स्थापना भएको थोरै समयमा समेत प्रदेशले राष्ट्रिय स्तरको ,उख्यमन्त्री कबड्डी कप आयोजना गर्न सफल भएको अनुभव सुनाउनु भएको थियो।
कोशी प्रदेश खेलकुद विकास बोर्डका सदस्य सचिव कृष्ण बस्नेत(पर्शुराम) ले भ्रमण तथा अनुभव आदानप्रदान कार्यक्रमको उद्देश्य प्राप्त गर्न सफल भएको बताउनु भयो। बस्नेतले अनुभव आदान प्रदान कार्यक्रममा अन्य प्रदेशको अनुभव सुन्नुको साथै कोशी प्रदेशले उत्कृष्ट रुपले सम्पन्न गरेको ‘प्रथम कोशी खेलकुद महोत्सव’, खेल संघ र संगठन दर्ताको कार्यविधि निर्माण लगायतको विषयमा अनुभव साझा गरेको जानकारी दिनु भयो।
बोर्डका कार्यालय प्रमुख कालिदास भट्टराईले उपाध्यक्ष विन्दिया कार्कीको नेतृत्वमा भ्रमणमा गएको टोलीमा बोर्ड सदस्य सचिव बस्नेत, बोर्डका सदस्य र कर्मचारीहरू, बोर्ड मातहतका जिल्ला खेलकुद विकास समितिका कार्यालय प्रमुख लगायतको सहभागिता रहेको थियो।
