विराटनगर । नेकपा एमालेको जनसंगठन नेपाल खेलकुद महासंघ कोशी प्रदेश कमिटीको प्रथम बैठक सम्पन्न भएको छ। आज विराटनगरमा बसेको महासंघ कोशीको बैठक तत्कालिन नेकपा एमालेका महासचिव मदन भण्डारीको ७४ औँ जन्मजयन्ती अवसरमा प्रदेश भरि सप्ताह व्यापी कार्यक्रम गर्ने निर्णय गर्दै सम्पन्न भएको हो।
प्रथम बैठकले सप्ताह व्यापी कार्यक्रम सहित प्रदेशका प्रत्येक वडा देखि लिएर क्लब स्तरमा संगठन विस्तार सहित अवधि पुगेका जिल्लाको अधिवेशन भदौ मसान्त सम्ममा सक्न निर्देशन दिने लगायतको निर्णय गरेको महासंघ कोशीका अध्यक्ष रोहित कोइरालाले जानकारी दिनु भयो।
कोइरालाले बैठकमा बोल्दै महासंघको संगठन प्रदेशका सम्पूर्ण वडा देखि क्लब स्तरमा विस्तार गरेर एमालेको ‘मिसन ८४’ सफल बनाउन सबै नेता कार्यकर्तालाई प्रतिबद्ध भएर लाग्नु पर्ने धारणा व्यक्त गर्नु भएको थियो।
बैठकमा महासंघका केन्द्रीय अध्यक्ष पर्शुराम बस्नेतले नेपालको विकासमा खेलकुद क्षेत्रको भूमिका अपरिहार्य रहेकोले राज्यले खेलाडीको क्षमता विकास र खेल क्षेत्रको प्रवर्द्धनलाई महत्वपूर्ण ढंगले सम्बोधन गर्नु पर्ने बताउनु भएको थियो। उहाँले महासंघले खेल क्षेत्रको समग्र विकासका लागि खेल क्षेत्रमा सक्रिय विभिन्न व्यक्तिलाई जोडेर अघि बढ्नु पर्ने धारणा व्यक्त गर्नु भएको थियो।
बस्नेतले तत्कालिन एमाले महासचिव भण्डारीद्वारा प्रतिपादित जनताको बहुदलीय जनवादमा प्रशिक्षण समेत दिनु भएको थियो।
त्यस्तै, बैठकमा नेकपा एमालेका केन्द्रीय सदस्य जीवन घिमिरेले मार्क्सवाद , ऐतिहासिक द्वन्दात्मक भौतिकवाद सम्बन्धी प्रशिक्षण दिनु भएको थियो। घिमिरेले प्रशिक्षणमा नेपाली कम्युनिस्ट आन्दोलनमा जबजको महत्व र अध्यात्मवाद र भौतिकवादका भिन्नता लगायतको विषयलाई समेट्नु भएको थियो भने महासंघ केन्द्रीय विज्ञ आयोग उपाध्यक्ष दिपेश बास्तोलाले महासंघको राष्ट्रिय निर्माणमा खेलकुदको महत्व र महासंघको कार्यक्रम सम्बन्धी प्रशिक्षण दिनु भएको थियो।
