उर्लाबारीमा एआई प्रविधि र साइबर अपराधबारे सञ्चारकर्मीलाई तालिम सुरु

१३ असार / उर्लाबारी
उर्लाबारीस्थित सञ्चार क्लब नेपालको आयोजनामा सञ्चारकर्मीहरूका लागि “एआई प्रविधि र साइबर अपराध” सम्बन्धी दुईदिने सचेतना तालिम सुरु भएको छ। सो तालिममा कोशी प्रदेश सरकारअन्तर्गतको आन्तरिक मामिला तथा कानुन मन्त्रालयको प्रमुख सहयोग रहेको छ।
प्रशिक्षकका रूपमा प्रदेश प्रहरी कार्यालय विराटनगरका डीएसपी ध्रुवबहादुर श्रेष्ठ उपस्थित छन्। तालिममा कृत्रिम बौद्धिकता (एआई) को वर्तमान प्रयोग, पत्रकारितामा यसको सकारात्मक पक्ष, तथा साइबर अपराधको सम्भावित जोखिमबारे विस्तृत जानकारी दिइने जनाइएको छ।
कार्यक्रम उद्घाटन गर्दै प्रदेशसभा सदस्य शोभा चेम्जोङ पालुङ्वाले एआई र प्रविधिको प्रयोगप्रति सकारात्मक दृष्टिकोण राख्न आग्रह गरिन्। उनले भनिन्, “एआई उपयोगी प्रविधि हो, तर यसमा पूर्ण रूपमा निर्भर नभई विवेकपूर्वक प्रयोग गर्न जरुरी छ।”
सो कार्यक्रमको सञ्चालन क्लबका पूर्वअध्यक्ष घनश्याम भण्डारीले गरेका थिए । यस्तै स्वागत मन्तव्य क्लबका उपाध्यक्ष तथा सो कार्यक्रमका संयोजक सुमन घिमिरेले राखेका थिए। क्लबका अर्का पूर्वअध्यक्ष नवराज भट्टराईले भने तालिमको उद्देश्य र महत्त्वबारे प्रकाश पारेका छन् ।
राजनीतिक दलका प्रतिनिधिका रूपमा नेकपा माओवादी केन्द्र उर्लाबारीका अध्यक्ष गजेन्द्र दंगालले पत्रकारको कलमले समृद्ध उर्लाबारी र सुशासन निर्माणमा योगदान पुर्‍याउने धारणा राखे।
सो अवसरमा बोल्दै उर्लाबारी–६ का वडाध्यक्ष चिन्तामणि पौडेलले सत्यतथ्यमा आधारित समाचार लेख्न आग्रह गर्दै पत्रकारहरूको रोजगार सुनिश्चित गर्न राज्यले भूमिका खेल्नुपर्ने बताए।
क्लब नेपालका अध्यक्ष कुमार खड्काको अध्यक्षतामा सुरु सो कार्यक्रममा उर्लाबारी र आसपास क्षेत्रका करिव ४० जना सञ्चारकर्मीको सहभागिता रहेको छ ।
सो कार्यक्रम उर्लाबारीस्थित होटल ग्राण्डमा संचालन भएको छ ।