विराटनगर । नेपाल खेलकुद महासंघ विराटनगर महानगरपालिका वडा नं १४ कमिटी अध्यक्षमा विवेक राउत सर्वसम्मत चयन हुनु भएको छ। आज सम्पन्न वडा भेलाबाट राउतको अध्यक्षतामा १४ सदस्यीय नयाँ कमिटी सर्वसम्मत भएको हो ।
नवनिर्वाचित कमिटीको उपाध्यक्षमा रितेश विक र कृष्ण मिश्र, सचिवमा इस्रफिन खान र सह–सचिवद्वयमा निखिल राउत, अनिल पासवान र कोषाध्यक्षमा निलम महतो सर्वसम्मत हुनु भएको हो। यस्तै, कमिटी सदस्यहरूमा करन राउत, सुमन राउत, चाँदनी शर्मा, विकास चौधरी, अनिल चौधरी, समिप श्रेष्ठ र चमन राउत चयन हुनुभएको महासंघका विराटनगर महानगर कमिटी सचिव विशाल बानियाँले जानकारी दिनु भयो।
वडा भेलामा बोल्दै नेपाल खेलकुद महासंघका कोशी प्रदेश कमिटी अध्यक्ष रोहित कोइरालाले महासंघले खेल प्रतियोगिता, खेल प्रशिक्षण तथा खेलाडीको संरक्षणमा गर्दै आएको कार्य उल्लेख गर्दै आगामी दिनको त्यस्ता कार्यको अग्रसरता वडा कमिटीले लिनु पर्ने बताउनु भयो। उहाँले महासंघको केन्द्रीय नीति ‘एक कमिटी, एक खेल गतिविधि’ लाई ध्यानमा राख्दै कार्य गर्न वडा कमिटीलाई शुभकामना समेत दिनु भयो।
वडा भेलामा नेपाल खेलकुद महासंघको स्थायी कमिटी सदस्य तथा महानगर इन्चार्ज मनोज विक्रम शाह, केन्द्रीय विज्ञ आयोगका उपाध्यक्ष दिपेश बास्तोला, नेपाल खेलकुद महासंघ विराटनगर महानगर कमिटी अध्यक्ष जतिन ताम्रकार लगायतको उपस्थिति रहेको थियो।
